Infosys: జాక్‌పాట్ కొట్టేసిన ఇన్ఫోసిస్. ఏకంగా రూ.16 వేల కోట్ల డీల్. పక్కా ప్లాన్‌తో

 Infosys: జాక్‌పాట్ కొట్టేసిన ఇన్ఫోసిస్.. ఏకంగా రూ.16 వేల కోట్ల డీల్.. పక్కా ప్లాన్‌తో!

Infosys: గత కొంతకాలంగా భారత ఐటీ పరిశ్రమ గడ్డుకాలాన్ని ఎదుర్కొంటున్న సంగతి తెలిసిందే. ఆర్థిక మాంద్యం భయాలు దీనికి కారణం. ఈ కష్టకాలంలోనూ దిగ్గజ ఐటీ సంస్థ ఇన్ఫోసిస్ పెద్ద డీల్ కొట్టేసింది. ఈ ఒప్పందం విలువ ఏకంగా రూ. 16 వేల కోట్లు కావడం విశేషం. దాని గురించి తెలుసుకుందాం.

Infosys Signs Deal: కరోనా సమయంలో ఆ తర్వాత కూడా పుంజుకున్న రంగం ఏదైనా ఉందంటే.. అది ఐటీనే. కరోనాతో దాదాపు చాలా కంపెనీలు మూతపడినా కూడా ఐటీలో ఉపాధి అవకాశాలు పెరిగాయి. ఉద్యోగులకు వర్క్ ఫ్రం హోం కల్పించి పని చేయించుకున్నాయి. అప్పుడు కూడా పెద్ద సంఖ్యలో పెద్ద మొత్తంతో కూడిన డీల్స్ కుదుర్చుకున్నాయి. అయితే ఇది ఒకప్పటి పరిస్థితి. గత సంవత్సర కాలంగా ఐటీ రంగం తీవ్ర ఒడుదొడుకులను ఎదుర్కొంటోంది. ప్రాజెక్టులు కూడా రావట్లేదు. దీంతో లాభాదాయాలు కూడా పడిపోయాయి. దీంతో ఉద్యోగులపై ఎఫెక్ట్ పడుతుంది. వారికి జీతాలు సరైన సమయంలో పెంచక.. వేరియబుల్ పే చెల్లింపులు పూర్తిగా చేయలేక.. ప్రమోషన్లు కూడా ఇవ్వని పరిస్థితులు ఎదురవుతున్నాయి.

ఇక ఇప్పుడు ఇలాంటి కష్టకాలంలోనూ దేశీయ దిగ్గజ ఐటీ సంస్థ ఇన్ఫోసిస్ భారీ డీల్ దక్కించుకుంది. ఈ ఒప్పందం విలువ 2 బిలియన్ డాలర్లు. భారత కరెన్సీలో ఇది రూ.16 వేల కోట్లకుపైనే ఉంటుంది. ఇన్ఫోసిస్ తన పాత క్లయింట్‌తోనే పెద్ద డీల్ కుదుర్చుకోవడం విశేషం. ఇందులో భాగంగా రానున్న ఐదు సంవత్సరాల్లో ఆర్టిఫిషియల్ ఇంటెలిజెన్స్ (AI) అభివృద్ధి, ఆటోమేషన్‌తో ఆధునికీకరణ, నిర్వహణ సేవల్ని అందించాల్సి ఉంటుంది. ఈ మేరకు సోమవారం స్టాక్ ఎక్స్చేంజి ఫైలింగ్‌లో వెల్లడించింది ఇన్ఫీ సంస్థ.

అయితే ఈ బెంగళూరు ప్రధాన కేంద్రంగా పనిచేస్తున్న సంస్థ.. తన క్లయింట్ పేరును మాత్రం వెల్లడించలేదు. ఇక ప్రస్తుత ఆర్థిక సంవత్సరానికి సంబంధించి ఏప్రిల్-జూన్ తొలి త్రైమాసికం ఫలితాలను ఇన్ఫోసిస్ గురువారం ప్రకటించనుంది. ఇందులో 4 నుంచి 7 శాతం వరకు వృద్ధి కనబరచనున్నట్లు అంచనాలు ఉన్నాయి. ఇది గత ఆరేళ్లలోనే అత్యల్పం కానుండటం గమనార్హం.

ఇక భారత దిగ్గజ ఐటీ సంస్థలు గత కొన్ని వారాలుగా పెద్ద పెద్ద డీల్స్ కుదుర్చుకున్నట్లు ప్రకటిస్తున్నాయి. గత నెలలోనే ఇన్ఫోసిస్ డాన్స్‌కే బ్యాంక్‌తో 454 మిలియన్ డాలర్ల విలువైన డిజిటల్ ట్రాన్స్‌ఫర్మేషన్ డీల్ చేసుకుంది. ఇంకా బెంగళూరులోని ఆ బ్యాంక్ కేంద్రం కూడా ఇన్ఫీ చేతుల్లోకే వెళ్లనుంది. అంతకుముందు టాటా కన్సల్టెన్సీ సర్వీసెస్ (TCS) జూన్‌లో 1.9 బిలియన్ డాలర్ల డీల్ కుదుర్చుకుంది. ఇన్ఫోసిస్ సంస్థమే మే నెలలోనూ 1.5 బిలియన్ డాలర్ల విలువైన డీల్ కుదుర్చుకుంది.