Layoff: ఉద్యోగులను భయపెట్టేందుకు షాకింగ్ నిర్ణయం.. ఏకంగా టాప్ పెర్ఫార్మర్‌నే..!

Layoff: ఉద్యోగులను భయపెట్టేందుకు షాకింగ్ నిర్ణయం.. ఏకంగా టాప్ పెర్ఫార్మర్‌నే..!

Layoff: తమ సంస్థలో పని చేస్తున్న ఉద్యోగులను భయపెట్టేందుకు ఓ కంపెనీ చేసిన పనికి అంతా ఆశ్చర్యపోతున్నారు. కంపెనీలో బాగా పని చేసే టాప్ పెర్ఫార్మర్‌ను ఉద్యోగం నుంచి తొలగించింది. ఈ విషయాన్ని రెడిట్ యూజర్ పోస్ట్ చేయడంతో వెలుగులోకి వచ్చింది. దీనిపై నెటిజన్లు మండిపడుతున్నారు.

Layoff: ఉద్యోగులు బాగా పని చేస్తే కంపెనీలు ఏం చేస్తాయి? ప్రోత్సహకాలు, అవార్డులు ఇస్తాయి. అలాగే మిగిలిన తోటి ఉద్యోగులకు ప్రేరణ కల్పించేందుకు వారిని బహిరంగంగా ప్రశంసిస్తాయి. వారి ప్రదర్శనను బట్టి ఎక్కువ కమిషన్‌, బోనస్‌లు ఇస్తుంటాయి. అంతే కాదు ఇంక్రిమెంట్లతో పాటు పదోన్నతులు కల్పిస్తుంటాయి. దాదాపు అన్ని కంపెనీల్లో ఇలాగే జరుగుతుంది. కానీ, ఇక్కడో కంపెనీ మాత్రం అందుకు విరుద్ధంగా బాగా పని చేసే టాప్ పెర్ఫార్మర్‌నే పీకేసింది. కంపెనీలోని ఇతర ఉద్యోగులకు తాము అవసరమైతే ఎవర్నైనా తొలగిస్తామన్న సందేశం పంపించడానికే ఇలా చేసినట్లు చెప్పిందటా. ఈ విషయాన్ని రెడిట్ యూజర్ ఒకరు పోస్ట్ చేయడంతో వెలుగులోకి వచ్చింది. తన పోస్టులో ఆ కంపెనీలో పని పరిస్థితులను కళ్లకుకట్టాడు. తమ కంపెనీలో పై స్థాయి ఉద్యోగులు.. కింది స్థాయి ఉద్యోగుల నుంచి కమీషన్ తీసుకుంటారని అందులో పేర్కొన్నాడు. ఇప్పుడు ఆ పోస్ట్ వైరల్‌గా మారింది.

తమ కంపెనీలో పై స్థాయి ఉద్యోగులు కాంట్రాక్ట్ నిబంధనలను ఏమాత్రం పట్టించుకోరని తెలిపాడు రెడిట్ యూజర్. ఒక వేళ 5 నిమిషాల కంటే ఎక్కువ సమయం టాయిలెట్‌లో గడిపితే వెంటనే వచ్చి డోర్ కొడతారని, ప్రశ్నలు వేస్తారని, నచ్చకపోతే వెళ్లిపోండి అని హెచ్చరిస్తుంటారని పేర్కొన్నాడు. అలాగే ఇటీవల తోటి ఉద్యోగిని అన్యాయంగా తొలగించారని గుర్తు చేసుకున్నాడు.

'ఒక రోజు నన్ను ఆఫీసులోకి పిలిచి ముందుగా చెప్పిన లక్ష్యాన్ని సాధించని కారణంగా ఉద్యోగం నుంచి తొలగిస్తామని బెదిరించారు. వాస్తవానికి నా నుంచి కమీషన్ తీసుకోవడానికి చేసిన పని అది. అయితే, ఇవాళ నాతో పాటు పని చేసే ఓ ఉద్యోగిని ఉన్నపళంగా తొలగించారు. వాస్తవానికి ఆ ఉద్యోగి బాగానే పని చేస్తాడు. కానీ, ఆయన సేల్స్ ఫిగర్స్ కాస్త తక్కువగా ఉన్నాయి. అంచనాలను అందుకోలదని వారు చెప్పారు. కానీ వాస్తవం వేరు. కమీషన్ తీసుకున్నారనో, కాంట్రాక్ట్ నిబంధనలు ఉల్లంఘించారనో ఇక మీదట ఎవరైనా ప్రశ్నిస్తే ఇదే గతి పడుతుందని చెప్పకనే చెప్పారు. మా డైరెక్ట్ మేనేజర్ ఇదే విషయాన్ని మాతో చెప్పారు. ' అని రెడిట్ పోస్టులో రాసుకొచ్చారు ఆ కంపెనీ ఉద్యోగి.

అయితే, ఈ సంఘటన ఎప్పుడు, ఎక్కడ జరిగిందనే పూర్తి వివరాలను పోస్టులో తెలపలేదు. కానీ, పలువరు నెటిజన్లు మాత్రమే ఈ పోస్టుపై తీవ్రంగా స్పందించారు. కంపెనీ వ్యవహరిస్తున్న తీరుపై అసహనం, ఆగ్రహం వ్యక్తం చేశారు. ఉద్యోగుల పట్ల ఇలా వ్యవహరించడం అన్యాయమని పేర్కొన్నారు. ఒకరిని తొలగించడంతో మరింత మంది నోరు నొక్కడమే కాకుండా వారి నుంచి మరింత కమీషన్ దోచుకునే ఎత్తుగడ అంటూ మరో యూజర్ కామెంట్ చేశారు. మొత్తంగా ఈ పోస్టుకు 800 లకు పైగా అప్ ఓట్స్ వచ్చాయి. 150 మందికిపైగా కామెంట్లు పెట్టారు. హీనంగా ప్రవర్తించిన కంపెనీ యాజమాన్యంపై ఆగ్రహం వ్యక్తం చేశారు. ఇదొక ఓపెన్ అండ్ షట్ కేసు. క్రిమినల్ కేసులు పెట్టేందుకు వీల్లేకపోవడం సిగ్గుచేటు అంటూ మరో యూజర్ రాసుకొచ్చారు.